Des Senteurs

Il se dit d’aucuns, comme d’Alexandre le grand, que leur sueur espandoit un’ odeur souefve, par quelque rare & extraordinaire complexion : dequoy Plutarque & autres recherchent la cause. Mais la commune façon des corps est au contraire : & la meilleure condition qu’ils ayent, c’est d’estre exempts de senteur. La douceur mesme des haleines plus pures, n’a rien de plus parfaict, que d’estre sans aucune odeur, qui nous offense : comme sont celles des enfans biens sains. Voyla pourquoy dit Plaute,

Mulier tum benè olet, ubi nihil olet.

La plus exquise senteur d’une femme, c’est ne sentir rien : Et les bonnes senteurs estrangeres, on a raison de les tenir pour suspectes, à ceux qui s’en servent, & d’estimer qu’elles soient employées pour couvrir quelque defaut naturel de ce costé-là. D’où naissent ces rencontres des Poëtes anciens, c’est puyr, que sentir bon.

Rides nos Coracine nil olentes.
Malo quàm benè olere, nil olere.

Et ailleurs,

Posthume non benè olet, qui benè semper olet.

J’ayme pourtant bien fort à estre entretenu de bonnes senteurs, & hay outre mesure les mauvaises, que je tire de plus loing que toute autre :

Namque sagacius unus odoror,
Polypus, an grauis hirsutis cubet hircus in alis,
Quàm canis acer ubi lateat sus.

Les senteurs plus simples & naturelles, me semblent plus aggreables. Et touche ce soing principalement les Dames. En la plus espesse Barbarie, les femmes Scythes, apres s’estre lavées, se saupoudrent & encroustent tout le corps & le visage, de certaine drogue, qui naist en leur terroir, odoriferante. Et pour approcher les hommes, ayans osté ce fard, elles s’en trouvent & polies & parfumées. Quelque odeur que ce soit, c’est merveille combien elle s’attache à moy, & combien j’ay la peau propre à s’en abbreuver. Celuy qui se plaint de nature dequoy elle a laissé l’homme sans instrument à porter les senteurs au nez, a tort : car elles se portent elles mesmes. Mais à moy particulierement, les moustaches que j’ay pleines, m’en servent : si j’en approche mes gans, ou mon mouchoir, l’odeur y tiendra tout un jour : elles accusent le lieu d’où je viens, changed to . les changed to Les estroits baisers de la jeunesse, savoureux, gloutons & gluans, s’y colloyent autrefois, & s’y tenoient plusieurs heures apres. Et si pourtant je me trouve peu subject aux maladies populaires, qui se chargent par la conversation, & qui naissent de la contagion de l’air ; & me suis sauvé de celles de mon temps, dequoy il y en a eu plusieurs sortes en nos villes, & en nos armées. On lit de Socrates, que n’estant jamais party d’Athenes pendant plusieurs recheutes de peste, qui la tourmenterent tant de fois, luy seul ne s’en trouva jamais plus mal. Les medecins pourroyent (ce crois-je) tirer des odeurs, plus d’usage qu’ils ne font : car j’ay souvent apperçeu qu’elles me changent, & agissent en mes esprits, selon qu’elles sont : Qui me fait approuver ce qu’on dit, que l’invention des encens & parfuns aux Eglises, si ancienne & espanduë en toutes nations & religions, regarde à cela, de nous resjouyr, esveiller & purifier le sens, pour nous rendre plus propres à la contemplation. Je voudrois bien pour en juger, avoir eu ma part de l’ouvrage de ces cuisiniers, qui sçavent assaisonner les odeurs estrangeres, avec la saveur des viandes. Comme on remarqua singulierement au service du Roy de Thunes, qui de nostre aage print terre à Naples, pour s’aboucher avec l’Empereur Charles. On farcissoit ses viandes de drogues odoriferantes, en telle somptuosité, qu’un Paon, & deux Faisans, se trouverent sur ses parties, revenir à cent ducats, pour les apprester selon leur maniere. Et quand on les despeçoit, non la salle seulement, mais toutes les chambres de son Palais, & les ruës d’autour, estoient remplies d’une tres-soüefve vapeur, qui ne s’esvanoüissoit pas si soudain. Le principal soing que j’aye à me loger, c’est de fuyr l’air puant & pesant. Ces belles villes, Venise & Paris, alterent la faveur que je leur porte, par l’aigre senteur, l’une de son maraits, l’autre de sa bouë.