Des pouces

Tacitus recite que parmy certains Roys barbares, pour faire une obligation asseuree, leur maniere estoit, de joindre estroictement leurs mains droites l’une à l’autre, & s’entrelasser les pouces : & quand à force de les presser le sang en estoit monté au bout, ils les blessoient de quelque legere pointe, & puis se les entresuçoient. Les medecens disent, que les pouces sont les maistres doigts de la main, & que leur etymologie Latine vient de pollere, changed to . Les Grecs l’appellent ἀντιχεὶρ, comme qui diroit une autre main. Et il semble que par fois les Latins les prennent aussi en ce sens, de main entiere :

Sed nec uocibus excitata blandis,
Molli pollice nec rogata surgit.

C’estoit à Rome une signification de faveur, de comprimer & baisser les pouces :

Fautor utroque tuum laudabit pollice ludum :

& de desfaveur de les hausser & contourner au dehors :

conuerso pollice uulgi
Quemlibet occidunt populariter.

Les Romains dispensoient de la guerre, ceux qui estoient blessez au pouce, comme s’ils n’avoient plus la prise des armes assez ferme. Auguste confisqua les biens à un chevalier Romain, qui avoit par malice couppé les pouces à deux siens jeunes enfans, pour les excuser d’aller aux armees : & avant luy, le Senat du temps de la guerre Italique, avoit condamné Caius Vatienus à prison perpetuelle, & luy avoit confisqué tous ses biens, pour s’estre à escient couppé le pouce de la main gauche, pour s’exempter de ce voyage. Quelqu’un, dont il ne me souvient point, ayant gaigné une bataille navale, fit coupper les pouces à ses ennemis vaincus, pour leur oster le moyen de combatre & de tirer la rame. Les Atheniens les firent coupper aux Æginetes, pour leur oster la preference en l’art de marine. En Lacedemone le maistre chastioit les enfans en leur mordant le pouce.