De la bataille de Dreux

Il y eut tout plein de rares accidens en nostre bataille de Dreux : mais ceux qui ne favorisent pas fort la reputation de M. de Guyse, mettent volontiers en avant, qu’il ne se peut excuser d’avoir faict alte, & temporisé avec les forces qu’il commandoit, cependant qu’on enfonçoit monsieur le Connestable chef de l’armee, avecques l’artillerie : & qu’il valoit mieux se hazarder, prenant l’ennemy par flanc, qu’attendant l’advantage de le voir en queuë, souffrir une si lourde perte. Mais outre ce, que l’issuë en tesmoigna, qui en debattra sans passion, me confessera aisement, à mon advis, que le but & la visee, non seulement d’un capitaine, mais de chasque soldat, doit regarder la victoire en gros ; & que nulles occurrences particulieres, quelque interest qu’il y ayt, ne le doivent divertir de ce point là. Philopœmen en une rencontre de Machanidas, ayant envoyé devant pour attaquer l’escarmouche, bonne trouppe d’archers & gens de traict : & l’ennemy apres les avoir renversez, s’amusant à les poursuivre à toute bride, & coulant apres sa victoire le long de la battaille où estoit Philopœmen, quoy que ses soldats s’en esmeussent, il ne fut d’advis de bouger de sa place, ny de se presenter à l’ennemy, pour secourir ses gens : ains les ayant laissé chasser & mettre en pieces à sa veue, commença la charge sur les ennemis au battaillon de leurs gens de pied, lors qu’il les vid tout à fait abandonnez de leurs gens de cheval : & bien que ce fussent Lacedemoniens, d’autant qu’il les prit à l’heure, que pour tenir tout gaigné, ils commençoient à se desordonner, il en vint aisement à bout, & cela faict se mit à poursuivre Machanidas. Ce cas est germain à celuy de Monsieur de Guise. En cette aspre battaille d’Agesilaus contre les Bœotiens, que Xenophon qui y estoit, dit estre la plus rude qu’il eust oncques veu, Agesilaus refusa l’avantage que fortune luy presentoit, de laisser passer le battaillon des Bœotiens, & les charger en queuë, quelque certaine victoire qu’i changed to il en previst, estimant qu’il y avoit plus d’art que de vaillance ; & pour montrer sa prouesse d’une merveilleuse ardeur de courage, choisit plustost de leur donner en teste : mais aussi fut-il bien battu & blessé, & contraint en fin se démesler, & prendre le party qu’il avoit refusé au commencement, faisant ouvrir ses gens, pour donner passage à ce torrent de Bœotiens : puis quand ils furent passez, prenant garde qu’ils marcheoyent en desordre, comme ceux qui cuidoyent bien estre hors de tout danger, il les fit suivre, & charger par les flancs : mais pour cela ne les peut-il tourner en fuitte à val de route ; ains se retirerent le petit pas, montrants tousjours les dents, jusques à ce qu’ils se furent rendus à sauveté.