# HyperEssays: The *Essays* of Michel de Montaigne Online

## Book 1 · Chapter 13: Ceremonie de l’entreveuë des Roys 

Il n’est sujet si vain, qui ne merite un rang en cette rapsodie. A nos regles communes, ce seroit une notable discourtoisie & à l’endroit d’un pareil, & plus à l’endroit d’un grand, de faillir à vous trouver chez vous, quand il vous auroit adverty d’y devoir venir : Voire adjoustoit la Roine de Navarre Marguerite à ce propos, que c’estoit incivilité à un Gentilhomme de partir de sa maison, comme il se fait le plus souvent, pour aller au devant de celuy qui le vient trouver, pour grand qu’il soit : & qu’il est plus respectueux & civil de l’attendre, pour le recevoir, ne fust que de peur de faillir sa route : & qu’il suffit de l’accompagner à son partement. Pour moy j’oublie souvent l’un & l’autre de ces vains offices : comme je retranche en ma maison autant que je puis de la ceremonie. Quelqu’un s’en offense : qu’y feroy-je ? Il vaut mieux que je l’offense pour une fois, que moy tous les jours : ce seroit une subjection continuelle. A quoy faire fuit-on la servitude des cours, si on l’entraine jusques en sa tasniere ? C’est aussi une reigle commune en toutes assemblees, qu’il touche aux moindres de se trouver les premiers à l’assignation, d’autant qu’il est mieux deu aux plus apparans de se faire attendre. Toutesfois à l’entreveuë qui se dressa du Pape Clement, & du Roy François à Marseille, le Roy y ayant ordonné les apprests necessaires, s’esloigna de la ville, & donna loisir au Pape de deux ou trois jours pour son entree & refreschissement, avant qu’il le vinst trouver. Et de mesmes à l’entree aussi du Pape & de l’Empereur à Bouloigne, l’Empereur donna moyen au Pape d’y estre le premier, & survint apres luy. C’est, disent-ils, une ceremonie ordinaire aux abouchements de tels Princes, que le plus grand soit avant les autres au lieu assigné, voire avant celuy chez qui se fait l’assemblee : & le prennent de ce biais, que c’est afin que cette apparence tesmoigne, que c’est le plus grand que les moindres vont trouver, & le recherchent, non pas luy eux. Non seulement chasque pays, mais chasque cité & chasque vacation a sa civilité particuliere : J’y ay esté assez soigneusement dressé en mon enfance, & ay vescu en assez bonne compagnie, pour n’ignorer pas les loix de la nostre Françoise : & en tiendrois eschole. J’aime à les ensuivre, mais non pas si couardement, que ma vie en demeure contraincte. Elles ont quelques formes penibles, lesquelles pourveu qu’on oublie par discretion, non par erreur, on n’en a pas moins de grace. J’ay veu souvent des hommes incivils par trop de civilité, & importuns de courtoisie. C’est au demeurant une tres-utile science que la science de l’entregent. Elle est, comme la grace & la beauté, conciliatrice des premiers abords de la societé & familiarité : & par consequent nous ouvre la porte à nous instruire par les exemples d’autruy, & à exploicter & produire nostre exemple s’il a quelque chose d’instruisant & communicable.

### Metadata
Book:        1
Chapter:     13
Updated:     September 4, 2026
License:     Public domain (https://creativecommons.org/publicdomain/zero/1.0/)
URL:         https://hyperessays.net/gournay/book/I/chapter/13/